Монголын Тэшүүрийн Мастеруудын Холбоо

Монголын Тэшүүрийн Мастеруудын Холбоо нь 2015 оны 11 сарын 01-нд үүсгэн байгуулагдсан. Холбооны удирдах зөвлөлд Н. Оюунцэцэг, Гүйлтийн тэшүүрийн - ОУХМ Л. Алтанцэцэг, ОУХМ - Б. Сансарбилэг, ОУХМ - Н. Эрдэнэтуяа, ОУХМ - Б. Батбаяр нар байдаг. МТМХ-Ерөнхийлөгч өөр Н. Оюунцэцэг ажиллаж байна. Тус холбоо нь нийт 123 гишүүнтэй. Холбооны хоёр удаагийн гүйлтийн тэшүүрийн мастер тамирчид Мастеруудын өвлийн олимпод оролцоод нийт 16 медаль (алт-7 мөнгө-6 хүрэл-3) аваад байна. ОУХМ, олон туршлагатай дасгалжуулагч багш нар гүйлтийн тэшүүр, шорт трекийн төрлөөр хүүхэд залуучуудыг дасгалжуулж байна. Гол сургалт явуулдаг газар нь Хандгайтын мөсөн гулгуурын талбай юм. 

Австри улсын Инсбрук хотноо 2020  нэгдүгээр сарын 10-19-нд болсон Дэлхийн ахмадын өвлийн спортын III наадмаас Монголын тэшүүрийн мастеруудын холбоо /МТМХ/-ны ахмад тамирчид тус наадмаас гүйлтийн тэшүүр, шорт трекийн төрөлд уралдаж 7 медалийг эх орондоо авчирсан юм. Гүйлтийн тэшүүрийн тэмцээнд спортын мастер 78 настай тамирчин Б.Жалбаа 5000 метрийн зайд уралдаж мөнгөн медаль, ОУХМ Л. Алтанцэцэг 5000 м-т мөнгө, 1500 м-т хүрэл медаль тус тус хүртэв. Мөн спортын мастер Р.Сарантуяа 5000 м-т мөнгө, ОУХМ Н.Эрдэнэтуяа 5000 м-т, ОУХМ Б.Базарсад 1500 м-т хүрэл медалийн эзэд болсон юм. Одоогоос 56 жилийн өмнө Монгол Улсын баг тамирчид анх удаагаа олимпын наадамд оролцож байсан түүхтэй. Энэ бол “Инсбрук-1964” өвлийн IX олимпын наадам бөгөөд Монгол Улсаас тэшүүр, цанын спортын төрлөөр баг тамирчид хурдаа сорин өрсөлдсөн. “Инсбрук-1964” өвлийн олимпын наадамд Монголын тэшүүрийн шигшээ багийн тамирчнаар оролцсон өдгөө 78 настай ахмад тамирчин Б.Жалбаа 56 жилийн дараа Инсбрук хотын мөсөн талбайд дахин уралдаж мөнгөн медаль хүртсэн нь ховорхон тохиох онцгой үйл явдал болсон. 

Монголын Тэшүүрийн Холбоо болон Монголын Тэшүүрийн Мастеруудын Холбоо хамтран цар тахлын улмаас хоёр жил тасалдсан гүйлтийн тэшүүрийн насанд хүрэгчид, мастеруудын улсын аварга шалгаруулах тэмцээнийг 2022 оны 2 сарын 26-27 өдрүүдэд зохион байгуулсан. Тэмцээнд нийт 73 тамирчин оролцсон. Тус тэмцээний зорилго нь хүн амыг биеийн тамир, спортын уралдаан тэмцээнд өргөнөөр хамруулах, идэвхи сонирхлыг нь хөгжүүлэх, тэшүүрийн спортыг олон түмэнд сурталчилах, тамирчдын ур чадварыг дээшлүүлэх, өндөр зэрэглэлийн тамирдыг тодруулах, ахмад тамирчид залуу мастер тамирчдын уялдаа холбоог сайжруулах, уралдаан тэмцээнд оролцох боломжоор хангах, тэдний түүхэн замналыг залуучуудад сурталчилах, үе үеийн тамирчдын амжилтаар бахархан эх оронч, эр зоригийн хүмүүжил залуу тамирчидад олгоход оршино.