Монголын Хоккейн Холбоо

Монголын Хоккейн Холбоо нь Монгол улсад хоккейн спортыг хөгжүүлэх, түгээн дэлгэрүүлэх, сурталчлан таниулах, өндөр чадвартай баг тамирчид бэлтгэх, сургалт, секц, тэмцээн уралдаан зохион байгуулах, олон улсын байгууллагатай хамтран ажиллах чиглэлээр үйл ажиллагаагаа явуулж байна.

Шайбтай хоккейн “Asian challence cup-2018” тэмцээнд ОУХМ А.Мэргэн дасгалжуулагчтай Монголын шигшээ баг анх удаагаа Ази тивийн аварга болж,алтан медаль хүртсэн. Филлипиний Манила хотноо Азийн хоккейн холбооны "Asian chаllenge cup-2018" тэмцээнд Монголын хоккейчид Тайландын багийг 5:1 харьцаатай хожиж 4 тоглолтонд 3 хожиж 9 оноотойгоор тэмцээний тэргүүн байрт бичигдэж байжээ.Тус тэмцээнд Филлипин, Сингапур, Кувейт ,Тайланд, Монгол Улсын нийт 5 баг оролцсон юм. А.Мэргэн дасгалжуулагчтай, Н.Мишигсүрэн ахлагчтай Монгол Улсын шайбтай хоккейн шигшээ баг 11 жилийн түүхтэй “Аsian challenge cup” тэмцээнд 2013, 2014, 2015, 2016 онуудад хүрэл медаль, 2017 онд мөнгө, 2018 онд алтан медалийн эзэд болж амжилтаа бататган ахиулсаар оргилд нь гарч чадсан. 

Малайзын нийслэл Куала Лампур хотноо шайбтай хоккейн “Asian challenge cup 2019” олон улсын тэмцээнд оролцсон Монголын шигшээ баг өмнөх амжилтаа бататгаж, хошой аварга болсноор Монголын хоккейн спортын түүхэнд нэгэн шинэ хуудсыг нээн аваргын цомтойгоор эх орондоо ирсэн. Манай тамирчид Куала Лампурт эхний тойрогтоо тэмцээний хүчтэй багийн нэг болох эзэн орон Малайзыг 9:5-ийн харьцаатай хожсон нь тэмцээнд оролцож буй багууд болон энэ спортыг сонирхогчдын дунд шуугиан тарьж чадсан юм. Улмаар дараагийн тоглолтод Сингапурыг 13:3-аар буюу онооны илт давуугаар ялсан нь ямар чадвартай баг болохоо харуулсан, тамирчдын урам зоригийг бадраасан гайхалтай тоглолт болж байсан. Хэдийгээр Филлипинийн шигшээ багт хожигдсон ч Малайзын багийг хожиж, аваргын төлөө дахин Филлипинийн багтай учраа таарсан. Шийдвэрлэх тоглолтод манай баг 6:3-аар даагаа нэхэж, “Asian challenge cup 2019” тэмцээнд итгэл төгс, аваргалсан.

"Ковид-19" халдварын улмаас 2 жил завсарласан 2019-2020 оны Монголын хоккейн лигийн аварга шалгаруулах тэмцээнийг Монголын Хоккейн холбоо болон Степпе Арена ХХК хамтран Монголд анх удаа  дэлхийн стандартын мөсөн ордонд 2021 оны 11 дүгээр сарын 21,22,24-нд зохион байгуулсан. Эрдэнэтийн Хангарьд баг шигшээ тоглолтод “Шарын гол” багийг 6:3-аар хожсоноор Монголын хоккейн лигийн аваргын 6 дахь цомоо өргөсөн.  
Хоккейн ач тус:

Өөх тос, илчлэгийг шатаахад тусалдаг
Биеийн зүрх судасны тогтолцоог хөгжүүлдэг
Бодисын солилцоог нэмэгдүүлдэг
Бүтэн биеийн дасгал болно
Булчингийн хүчийг нэмэгдүүлдэг
Гар нүдний зохицуулалтыг хөгжүүлдэг
Биеийн зохицуулалт, тэнцвэр сайжирна
Багаар ажиллах сэтгэхүйг хөгжүүлнэ
Харилцаа холбоог сайжруулна