Mongolian Esports Association

Тэртээ 2003 онд Монголын электрон спортын ууган холбоо болох MESA байгуулагдаж байв. Тэр цагаас хойш бид ололт амжилт, алдаа оноо, саад бэрхшээл, баяр хөөр, уйтгар гуниг хосолсон гайхалтай 19 жилийг ардаа үджээ.

Энэ хугацаанд манай холбоо олон улсын электрон спортын томоохон байгууллага, холбоодын албан ёсны гишүүн болж баг тамирчдаа олон улсын тэмцээнүүдэд илгээж байв. Үүний зэрэгцээ Монголын тамирчдын болон мэргэжлийн багуудын ур чадвар ч үлэмж хэмжээнд сайжирч байсныг бид бүхэн мэднэ. Баг тамирчид маань ч ази төдийгүй дэлхийн түвшинд улсынхаа нэрийг өндөрт өргөж тивийнхээ аварга болж дэлхийн зэрэглэлийн тэмцээнүүдэд оролцох болсон юм.

Бид энэ гайхалтай суурийг улам илүү хөгжүүлж электрон спортын мэргэжлийн орчныг бүрдүүлж дэлхийн хэмжээний олон олон шилдэг баг, тамирчин төрүүлэхийн төлөө бүхнээ дайчлан ажилласаар өнөөдрийг хүрсэн билээ. Бид цаашдаа ч энэ эрчээ алдалгүйгээр ажилласаар байх болно.

Бидний үйл ажиллагаа эхэлж байх он жилүүдэд нийгмээс төрөл бүрийн, сөрөг хандлагыг хүлээн авдаг байлаа. Харин одоо юмс өөрчлөгдсөн.

Монголын баг тамирчид, тус салбарт зүтгэж буй залуус маань аль хэдийн ирээдүйн Монголын Esport-ын хөгжих замналыг өөрсдийн бодит амжилтаар зураад эхэлчихсэн байна. Монголын Электрон Спорт Холбооны хамт олон бид одоогийн болон ирээдүйн баг тамирчдын хөгжих орон зайг бий болгож тус спортын хөгжлийг түүчээлэн авч явах залуусыг бэлтгэхийг гол зорилгоо болгон ажиллаж байна.